5,78. จตุตฺถทุติยานํ ตติยปฐมา

ทฺวิตฺเต ปุพฺเพสํ จตุตฺถทุติยานํ ตติยปฐมา โหนฺติ ยถากฺกมํติ พกาเร โส พภูว กิร, เต พภุวุ กิรฯ ตฺวํ พภุเว กิร, อิญ ตุมฺเห พภุวิตฺถ กิรฯ อหํ พภุว กิร, มยํ พภุวิมฺห กิรฯ โส พภุวิตฺถ กิร, เต พภุวิเร กิรฯ ตฺวํ พภุวิตฺโถ กิร, ตุมฺเห พภุวิวฺโห กิรฯ อหํ พภุวิ กิร, มยํ พภุวิมฺเห กิรฯ กมฺเม-อนุปภุว กิร อิจฺจาทิฯ ภาเวพภุว พภุวิตฺถ กิรฯ

ปปจ, ปปจุฯ ปปเจ, อิญาคเม ปปจิตฺถฯ อญฺญตฺร ‘‘สํโยคาทิโลโป’’ติ โลโป, ปปจิตฺถฯ ปปจ, ปปจิมฺหฯ ปปจิตฺถ, ปปจิเรฯ ปปจิตฺโถ ปปจิโถ, ปปจิวฺโหฯ ปปจิ, ปปจิมฺเหฯ เอวํ กมฺเมฯ

ออาทิปจฺจเย ทฺวิภาเว อนาทิพฺยญฺชนโลเป ปุพฺพสฺส ‘‘กวคฺคหานํ จวคฺคชา’’ติ จวคฺคชกาเร ‘‘พฺยญฺชเน ทีฆรสฺสา’’ติ ทีเฆ จ กเต โส คามํ ชคาม กิร, ชคมุฯ ชคเม, ชคมิตฺถฯ ชคม, ชคมิมฺหฯ ชคมิตฺถ, ชคมิเรฯ ชคมิตฺโถ, ชคมิวฺโหฯ ชคมิ, ชคมิมฺเหฯ เอวํ กมฺเมฯ

มูฬฺหวิกฺขิตฺตพฺยาสตฺตจิตฺเตน อตฺตนาปิ กฺริยา กตา อภินิพฺพตฺติกาเล+นุปลทฺธาสมานา ผเลนา+นุมียมานา ปโรกฺขาว วตฺถุโตฯ เตน อุตฺตมวิสเยปิ ปโยคสมฺภโวฯ (ปโรกฺขาปจฺจยนโย)ฯ

7. ยฺโยโท วา+ติปตฺติยํ สฺสา สฺสํสุ สฺเส สฺสถ สฺสํ สฺสมฺหา สฺสถ สฺสิํสุสฺสเสสฺสวฺเหสฺสิํ สฺสามฺหเสฯ

เอยฺยาโท วิสเย กฺริยาติปตฺติยํ สฺสาทโย โหนฺติฯ วิธุรปจฺจโยปนิปาตโต การณเวกลฺลโต วา กฺริยาติปตน+มนิปฺผตฺติ กฺริยาติปตฺติฯ เอเต จ สฺสาทโย สามตฺถิยา อตีตานาคเตสฺเวว โหนฺติ, น วตฺตมาเน, ตตฺร กฺริยาติปตฺยสมฺภวาฯ อิญาคเม สฺสาสฺส วา รสฺเส จ สเจ โส ปฐมวเย ปพฺพชฺชํ อลภิสฺส, อรหา อภวิสฺส ภวิสฺส อภวิสฺสา ภวิสฺสา วา, เต จ ตํ อลภิสฺสํสุ, อรหนฺโต อภวิสฺสํสุ ภวิสฺสํสุฯ ‘‘เอยฺยาถา’’ทินา สฺเสสฺส วา อกาเร ตฺวํ อภวิสฺส ภวิสฺเสฯ ตุมฺเห อภวิสฺสถฯ อหํ อภวิสฺสํฯ รสฺเส มยํ อภวิสฺสมฺห ภวิสฺสมฺห อภวิสฺสมฺหา ภวิสฺสมฺหาฯ ปรจฺฉกฺเก-โส อภวิสฺสถ, อภวิสฺสิํสุฯ อภวิสฺสเส, อภวิสฺสวฺเหฯ อภวิสฺสิํ, อภวิสฺสามฺหเสฯ

กมฺเม-เตน สุขํ อนฺวภวิสฺส, อนฺวภวิสฺสํสุ กฺยโลโปฯ อนฺวภูยิสฺส อนฺวภูยิสฺสา อิจฺจาทิฯ ภาเว-เตน อภูยิสฺส ภูยิสฺส อภูยิสฺสา ภูยิสฺสาฯ อภูยิสฺสถ ภูยิสฺสถฯ

เอวํ ตณฺฑุลาทิสาธนํ อลภิสฺส, โอทนํ อปจิสฺส ปจิสฺส อิจฺจาทิฯ กมฺเม-เตน โอทโน อปจิสฺส ปจิสฺส อปจิสฺสา ปจิสฺสา อปจียิสฺส ปจียิสฺส อปจียิสฺสา ปจียิสฺสา อปจฺจิสฺส ปจฺจิสฺส อปจฺจิสฺสา ปจฺจิสฺสา อิจฺจาทิฯ

โส อคจฺฉิสฺส คจฺฉิสฺส อคจฺฉิสฺสา คจฺฉิสฺสา อิจฺจาทิฯ จฺฉาเทสา+ภาเว อคมิสฺส คมิสฺส อคมิสฺสา คมิสฺสา อิจฺจาทิฯ